有時我都會靜落嚟諗一諗，原來「而家仲未懷孕」呢段時間，本身就係一份禮物。
作為一個妻子，呢個階段俾咗我同老公好多空間。我哋可以隨時約朋友上屋企，幾多日都得；屋企仍然可以保持一份安靜，屬於我哋兩個人嘅時間。夜晚可以慢慢傾偈，傾未來、傾財務、傾生活方式，慢慢摸索我哋想要嘅人生方向。
呢段「安靜期」，亦都俾我哋有更多時間去浪漫。唔係大排場，而係兩個人一齊去做一啲值得記住、唔會忘記嘅小事——一齊行街、一齊煮飯、一齊笑。原來，兩個人單純咁同行，本身已經好珍貴。
等待BB嘅過程，其實都係一個操練信心嘅過程。我學習將更多嘅信靠交俾神，亦都喺靈命上慢慢被建立。呢段時間，我同老公都可以更投入教會嘅服侍，將而家仍然相對自由嘅時間，獻俾神、獻俾人。
我亦都更加珍惜同父母相處嘅時間——呢份家庭時光，其實係我內心一直渴望、亦都好珍而重之嘅。
我有諗過，係咪應該俾自己一個短暫嘅 break，返香港走一轉。不過現實上，又要考慮工作，同埋結婚之後，我又唔太捨得留老公一個喺加拿大。所以都仍然喺禱告同思考當中。
我知道，一旦懷孕，我嘅身體會進入一個完全唔同嘅階段——重量、感覺、身心都會改變。所以而家，我都想好好珍惜呢個「未曾生育過」嘅身體。當然，我依然深信，母親身份係世界上其中一樣最偉大嘅事，亦都係神創造我哋其中一個美麗嘅心意。
願神賜我哋一個健康嘅孩子，亦都願佢將來認識基督、與主建立關係，一生榮耀神。
願神祝福我哋嘅父母，賜佢哋忍耐與盼望，等候孫兒嘅來臨。
願神祝福我同我丈夫，有同心合意嘅渴望，亦都有健康嘅身體去承載生命。
願神賜我一個結果子嘅子宮，擴展我哋嘅家庭。
奉主耶穌基督嘅名祈求，阿們。 🙏
No comments:
Post a Comment